都市點評 用心苦幹 黃永幟

都市點評 用心苦幹 黃永幟


2018-11-23 07:27:48 (181 次瀏覽)

以「小說話多做事」來形容黃永幟準沒錯!
過去從飲食節目中,認識的黃永幟比普遍名廚、主持人較沉穩寡言,但一開口總能夠讓觀眾袋不少煮食資訊落袋,而私下接觸的他亦貫徹一向低調的性格,雖然訪問當日全程話不多,但來到爐具前,認真為大家炮製美味佳餚,又默默着員工準備好一切採訪所需,毫無架子,招呼周到。談到創辦的集團於今年初上市,9月又於灣仔開設新食肆「龍袍」,身為行政總裁的黃永幟卻謙稱:「仲未算成功,依家都係開始啫。」或許人生經歷過大起大跌、冷嘲熱諷,才教他埋頭苦幹、實事實幹。

撰文:黎寶倫|攝影:ChaseK

人稱「幟哥」的飲食界名人黃永幟,於04年創立龍皇酒家飲食集團,旗下品牌龍皇、龍宴、龍璽及皇璽,至今已遍布香港、澳門及上海,直到今年初,龍皇集團終於正式上市,公司亦食住個勢,於9月在灣仔開設全新高端酒家「龍袍」,以酒店式的思維與概念,為食客提供更優質、創新的佳餚。
賺錢養員工
「龍袍比龍璽大眾化少少,呢度嘅餸菜都會特別啲,我哋會改良一啲比較Fusion,或者味道比較特別嘅菜式。而呢間又比龍皇高檔少少,店長都係喺6星級酒店出嚟,部分員工都係重金禮聘過嚟,所以依家生意好難做,人工同舖租又貴,好在大部分食材自己入,如果再叫人交貨嚟,根本冇錢賺。」絕非開玩笑!去年,龍皇集團因申請創業板上市而把財務數據曝光,有指16年集團收入達3.94億元,扣除所有成本後,純利僅得113萬元。
說到由學徒、廚師、大廚、總廚,一步步成為上市公司行政總裁,重擔自然愈來愈大,幟哥直言:「以前做廚師係打工,打工冇乜壓力,主要係老闆叫出新菜,或者客人覺得啲餸唔好咪自己改良囉,壓力唔大,但做咗老闆,依家下面都有800至900個員工,每到出糧時好多錢㗎嘛,如果嗰間生意淡少少嘅話,個壓力都好大,因為你自己唔食,夥計都要食,夥計養緊家、供緊樓,你唔可以話突然之間唔做,要有責任感囉。」能夠體察民情,全因這位老闆也曾捱過苦。

父親管教嚴
一路走來,原來幟哥的成功背後也經歷過高低起跌。出身自廚藝世家的他於20歲入行,雖然父親黃江乃美麗華酒店總廚及利苑酒家顧問,但當年幟哥並沒有獲爸爸親授廚技,反而被安排跟3位惡爆師傅學藝,由低做起,「我去佢間酒家做,佢唔准我認係佢個仔,最污糟、下欄嘅嘢就叫我做,爸爸教我思想同做人品德,煮餸就搵3個最惡嘅師傅教我,做錯少少個炒殼(勺子)就打落嚟,好嚴格,但我從來冇諗過放棄,因為未做呢行之前都做過好多行,做行行都唔係好如意、暢順,好似唔係好鍾意咁,點知一踏入呢行,原來自己都鍾意煮餸。」
結果短短7年,從翠亨村中廚師擢升為利苑酒家「最年輕大廚」,無奈不久他便沉迷賭博,即便後期舉家移民澳洲,幟哥依然戒不掉賭癮,愈賭愈大,「好心酸,做廚嗰時好賭,賭到身無一文,欠落一堆債畀人追,喺澳洲嗰段時間又比較悶,自己就沉迷咗嗰樣嘢。」幸最終他亦醒覺,洗心革面回港發奮圖強。

低谷爬起身
「回流返嚟嗰時,我同自己講『我再唔會沉迷賭錢』,之後儲錢開展自己嘅事業。當時身邊嘅人都不停嘲笑我『冇乜文化,個人又爛賭又Hea,邊會掂呀!』自己聽到都好低沉,之後瞓一覺諗諗『唔好畀人睇小先得㗎』,自己咪做好佢,每一樣嘢、每日有咩唔好咪改良,一路進步囉。」回想過去,幟哥不單止被人睇死,連太太也極力反對他創業,「佢覺得我喺集團做總廚,一年入息都幾百萬,做乜出嚟搏啫?啲仔女又細,萬一唔掂佢哋點算?『唔掂咪返澳洲囉,福利好嘛』我只可以咁樣安慰佢,自己咪大膽出嚟搏囉。」
終於憑着自己的堅持,虛心向各行各業的生意人請教,「龍皇」亦慢慢做出成績來,笑問現在是否可剝太太棚牙?幟哥打趣道:「希望係啦!」至於成功之道,謙稱一切仍在起步的他,表示最緊要用心和用腦,「既然揀得呢行做職業,你就要用心去做,仲要用腦去發揚你做嗰樣嘢,如果你個腦轉得唔夠快,就跟唔上潮流、慢人一步。」因此,幟哥至今仍不時去外國研究新菜式,活到老學到老。

龍袍
地址:灣仔港灣道30號新鴻基中心2樓2C及2D號舖
電話:2180 6533
營業時間:星期一至六11:00 – 15:00及18:00 – 23:00、星期日及公眾假期10:00 – 15:00及18:00 – 23:00

  •  

  •  

  • 白酒汁蛋白煎蝦球 $480 大大隻的沙巴老虎蝦,肉質甜美紮實,面頭再鋪上蟹肉炒蛋白,入口嫩滑。

  •  

  • 原來XO醬和楊枝甘露是幟哥所創的,縱橫飲食界40年的他至今仍定期出埠搵食材,每個月又會舉辦一次新菜會,務求為食客研發出更好味、更創新的菜式。

  • 高端酒家「龍袍」早前於灣仔開幕,幟哥表示預計一年只開一舖,會先專注重整旗下食肆品質,再觀察多幾年才於內地大展拳腳。

  • 酒曲三角蜆 $228 蜆肉本身鮮甜爽口,以滷水、八角、陳皮等烹調後,略帶酒香,令人不禁一口接一口。

  •  

  • 龍袍二頭花膠扒 $4,800 來自維多利亞湖的鱸魚花膠,以大地魚、蝦乾、蒜頭等炆煮,味道香口彈牙。

  • 龍袍上素撈起 $388 配合健康飲食,採用素鮑魚、素雞取代三文魚,再淋上意大利陳醋、豉油、檸檬汁等調製的醬汁,酸酸甜甜非常開胃。

  • 龍袍焗胡椒雞 $388 以黑、白胡椒烤焗的雞,加上青胡椒點綴,再吸收埋鋪底的香蔥味,香濃美味而不膩。

直接聯絡FBIHub

查詢熱線

+852 3709 8890

發送電郵

info@fbihub.com.hk